إيطاليا – مدينة (فيرونا)
(فيرونا وبى بى الحمامة المجنونا) دة العنوان اللى اطلقناة على القصة اللى حكاها لنا المغترب المصرى (امجد برسوم نجيب) وقال فيها …….
ايطاليا تحتفل بعيد الربيع زى كل اوربا .. مهرجانات .. مأكولات .. وفسح وخروجات ..لكن يزيد عليها هو ان الزوجة الايطالية فى اليوم دة تفتح نوافذ البيت كلها وتحس كأنك نايم فى الشارع ..وتزين البيت بالورد وكانك فى محل بيع زهور او متجوز (بائعة الورد).
ولما تسأل … هو فية آية ؟ تقولك : حمد على السلامة .. مبروك خروجك من السجن .. طبعاً لو واحد مصرى زى حالاتى لازم يتخض ويقولها .. سجن مين يا بنت ……. تلحقك قبل ماتكمل وتقولك (سجن الشتاء). والحكاية ان فى اعتقدهم أن الشتاء دة سجن والربيع هو الافراج. ودة بسبب الاخ (أنجلو بوليزيانو)
الاخ (أنجلو بوليزيانو) دة كاتب مسرحى ايطالى لة مقولة شهيرة بيدرسوها فى المدارس بيقول فيها …(إذا أغلقت الشتاء أبواب بيتك .. وحاصرتك تلال الجليد من كل مكان .. فانتظر قدوم الربيع وافتح نوافذك لنسمات الهواء النقي .. وانظر بعيدا فسوف ترى أسراب الطيور وقد عادت تغني .. وسوف ترى الشمس وهي تلقي خيوطها الذهبيه فوق أغصان الشجر لتصنع لك عمراً جديداً وحلماً جديداً .. وقلباً جديداً(.
فيرونا وبى بى الحمامة المجنونا
سيبك بقى من كل اللى قالة الاخ (أنجلو بوليزيانو) وخليك فى جملة (وانظر بعيدا فسوف ترى أسراب الطيور وقد عادت تغنى) لان الحقيقة اللى شفتة ان الطيور عملت غير كدة ؟! ..اللى شفتة .. ان ابنى الصغير المسكين كان بيلعب .. وفجأة رجع وهو بيبكى بحرقة ومشمئز وماشى بطريقة (الزومبى)
ولما بنسألة مالك شاور على راسة .. واكتشفنا السبب ؟
احد الطيور وتحديداً (حمامة) عملتها على راسة. بس واضح ان الحمامة دة كانت متغذية وواكل أكلة دسمة. مهو .. المشكلة فى المتنزهات العامة .. ان الطيور بتتغذى كويس وواخدة راحتها .. وبتعملها على راس الطخين .. دة انا بعينى شايف حمامة وقفة بتعملها على راس ثمثال (لويس الثانى) ملك ايطاليا …الشيئ المؤسف ان المفروض انا (كأب) اهدئ من روعة ابنى واقولة معلش ..زى ماكان اهلنا بيعملوا معنا ويقولولنا .. (معلش انت ح تتكسى). ولو انى مش عارف اية العلاقة بين براز الطيور والملابس الجديدة.
فيرونا وبى بى الحمامة المجنونا
لكن اللى حصل انى قعدت أضحك وانا عارف ان ضحكى دة زعل ابنى. لكن .. انا بضحك لسبب .. وهو انى تذكرت حكاية لطيفة. وهى انة فى الستينات اثناء اعداد المانيا لحفل اقتتاح الاولمبياد ..اعدت الآلاف من الحمام لاطلاقة كرمز للسلام ..وفعلاً اطلقتة ليملاء سماء الملعب. فوق رؤس المشجعين والحاضرين فى مشهد مهيب. واكملاً لمراسم الافتتاح انطلقت الالعاب النارية ..وهنا حدثت الكارثة
صوت الالعاب النارية سبب فزع رهيب للحمام نتج عنة أسهال مفاجأ للحمام …وكانت النتيجة سيل من براز الحمام على رؤس الحاضرين. كنت عايز اقول لابنى اللى قاعد مشمئز وقرفان. احمد ربنا دة حمامة واحدة اللى عملتها عليك ..آمال لو كنت معاهم فى الملعب كنت حتعمل آية ؟
بالنسبة للسياحة فى فيرونا. يعتبر منزل جوليت صاحبة اشهر قصة رومانسية فى التاريخ هى ورميو. ومنزلها مزار للسياح.
وارينا فيرونا. ودة مدرج ومسرح روماني ومزار سياحى مهم.
وساحة دايلي إربي. مقصد لكل اللى بيزور فيرونا.
ومن الاماكن السياحية ايضاً. برج لامبيرتي ويعتبر اطول برج فى فيرونا. طولة ٨٤ متر.
ايطاليا,فيرونا,السياحة في ايطاليا,سياحة,فيرونا ايطاليا سياحة,ايطاليا سياحة,سفر زيارة سياحة رحلة ميلانو إيطاليا فيرونا,فيرونا ايطاليا,ايطاليا سياحة ٢٠٢١,ميلانو ايطاليا سياحة,السياحة في اوروبا,إيطاليا,السياحة,السياحة في ايطاليا 2022,فيرونا ايطاليا المسافرون العرب,مدينة فيرونا ايطاليا verona italy,سياحة في ايطاليا,مدن ايطاليا سياحة,سياحة ايطاليا,ايطاليا روما سياحة,ميلان ايطاليا سياحة,سياحة فيرونا,فيرونا سياحة,فينيسيا ايطاليا سياحة